Madalas nating marinig sa mga tagapagturo ng sektang
Protestante at mga nagpapakilalang Born Again Christian ang paniniwala tungkol
sa napakadaling paraan daw ng kaligtasan. Sinasabi nila na basta tanggapin mo
lamang daw si Cristo bilang sariling tagapagligtas o personal savior ay ligtas
ka na at wala ka nang gagawin pa. Para patunayan diumano ang kanilang sinasabi ay gumagamit din sila ng
Biblia. Ang pinaka paborito nilang talata ay ang nakasulat
sa John 3:16.
„Sapagka’t gayon
na lamang ang pagsinta ng Dios sa sanglibutan, na ibinigay ang kaniyang bugtong
na Anak, upang ang sinomang sa kaniya’y sumampalataya ay huwag mapahamak, kundi
magkaroon ng buhay na walang hanggan“
Sa nasabing talata ay mayroon silang dalawang ipinupuntos,
una lahat daw ng tao sa mundo ay nailigtas ni Cristo. Pangalawa, sumampatalaya
ka lamang daw kay Cristo ay ligtas ka na, wala ka ng gagawin pa. At para
suportahan ang kanilang sinasabi ay gagamitin din nila ang nakasulat sa Galacia
2:16, Efeso 2:9 at Tito 3:5
Sa unang tingin ay iisipin mo nga naman na may
punto sila at ang sinasabi nila ay totoo. Komo sila ay gumagamit din ng biblia,
ang akala ng marami ay totoo na ang kanilang aral kaya ang resulta ay marami
ang napaniwala. Kaya kapag pinupuna natin ang kanilang aral, ay sumasama ang
loob nila na para bagang ang pinupuna natin ay ang mismong pagkatao ng kanilang
mga tagapagturo.
Sa pagkakataong ito ay tatalakayin natin kung totoo
ba ang kanilang sinasabi at ang malaganap na paniniwala bang ito ay nakasalig ba
talaga sa biblia?
Balikan natin ang nakasulat sa
Juan 3:16 na ganito ang sinasabi:
„Sapagka’t gayon na lamang ang pagsinta ng Dios sa
sanglibutan, na ibinigay ang kaniyang bugtong na Anak, upang ang sinomang sa
kaniya’y sumampalataya ay huwag mapahamak, kundi magkaroon ng buhay na walang
hanggan“
Kahit basahin pa natin ng
paulit ulit ang nasabing talata ay wala tayong mababasa na nailigtas ni Cristo
ang lahat ng tao sa sanglibutan kagaya ng kanilang sinasabi. Komo kasi binabanggit
ang salitang sanglibutan, ang akala nila ay ang buong sanglibutan na ang
nailigtas ni Cristo.
Kung tatanggapin natin na tama
ang kanilang paniniwala, lilitaw na wala na palang mapapahamak. Ang problema ay
may mga talata itong kokontrahin Kaya hindi maaaring tanggapin ang gayong
paniniwala. Bakit?
Gaano ba kadami ang maliligtas ayon sa Panginoon?
Ganito ang mababasa sa Lukas
13:23-24
“May isang nagtanong sa kanya: “Ginoo kakaunti po ba ang maliligtas?” Sinabi
niya, “Pagsikapan ninyong pumasok sa makipot na pintuan.
Sinasabi ko sa inyo, marami ang
magpipilit na pumasok ngunit hindi makapapasok.”
Samakatuwid ay kakaunti lamang ang maliligtas ayon
sa Panginoon.
Gaano naman kadami ang
mapapahamak?
Kapag binasa natin ang
Apocalipsis 20:8-9 ay kasing dami ng buhangin sa dagat ang mga taong susunugin
sa dagat dagatang apoy.
Samakatuwid hindi talaga
pwedeng tanggapin ang kanilang paniniwala na lahat ng tao ay nailigtas ni
Cristo.
Eh sino ba kung gayon ang tinutukoy sa John 3:16 na
hindi mapapahamak at magkakaroon ng buhay na walang hanggan?
Sagot: ayon sa talata ay ang sinomang sa kaniya’y sumampalataya.
Samakatuwid, hindi ang buong sanglibutan.
Pero siguradong ang susunod nilang sasabihin ay
ganito:
„Kita niyo? Tama nga kami. Sumampalataya
ka lamang kay Cristo ligtas ka na…”
Kahit bali baligtarin natin ang talata ay wala tayong
mababasa na sumampalataya „lamang“ kay Cristo ay ligtas na. Ang problema kasi
ay dinadagdagan nila ng salitang „lang or lamang“ kaya nagiiba tuloy ng
kahulugan ang talata. Sila kasi ang pilit na nagbibigay ng kahulugan sa
nasabing talata. Bakit hindi mismo ang biblia ang pasagutin natin?
Sino ba ang mga TUNAY na sumasampalataya kay Cristo?
Sa Juan 8:31 ay
ganito ang mababasa:
“Sinabi
nga ni Jesus sa mga Judiong yaon na nagsisisampalataya sa kaniya, Kung kayo'y magsisipanatili sa aking salita, kung magkagayo'y tunay nga kayong mga alagad ko;”
Ito ay pangungusap mismo ng Panginoong Jesus. Kung
tatanggapin natin na tama ang sinasabi nila na sumampalataya lamang kay Cristo
ay ligtas na, Ito sana ang napakagandang pagkakataon na sabihin ni Cristo sa
mga Judio na ligtas na sila dahil sumasampalataya sila pero sa halip, ano ang sinabi
ni Cristo?
“…Kung kayo'y magsisipanatili sa aking salita, kung magkagayo'y tunay nga kayong mga alagad ko;”
Malinaw na ang mga tunay na alagad ni Cristo ay
yaong mga nagsisipanatili sa kanyang salita, hindi yung mga sumasampalataya
lamang.
Baka itanong nila sa atin kung ano ba ang ibig
sabihin ni Cristo na magsipanatili sa kanyang salita? Ito ba yung mga taong sasabihin
lamang na tinatanggap niya si Cristo bilang personal savior? Kung babasahin
natin sa ibang salin ng biblia ay ganito ang banggit:
“Kung patuloy kayong susunod sa aking
aral…”(Juan 8:31, Magandang Balita)
Samakatuwid, ang mga tunay na alagad ni Cristo ay
may gagawin, susunod sa kaniyang aral sapagkat iyon ang magiging katibayan na
tunay nga silang alagad ni Cristo at hindi sasampalataya lamang gaya ng kanilang itinuturo.
Kahit pa basahin natin ng buo ang biblia ay wala
tayong mababasa na utos ni Cristo at ng mga Apostol na “sumampalataya lamang”
ang tao para maligtas. Hindi sila makakapagbigay ng kahit isang talata dahil kabaligtaran ito sa
nakasulat sa biblia.
Ano ang katunayan?
Ganito ang mababasa sa Santiago 2:24
“Nakikita
ninyo na sa pamamagitan ng mga gawa'y inaaring ganap ang tao, at hindi
sa pamamagitan ng pananampalataya lamang.”
Sa ating binasa ay maliwanag na
kinontra ng biblia ang kanilang paniniwalang sumampalataya lamang ay ligtas na
dahil ang sabi sa talata ay inaaring ganap ang tao sa pamamagitan ng gawa at
hindi sa “pananampalataya lamang”. Ang gawa kasi ang nagpapasakdal sa
pananampalataya kaya hindi pwedeng wala ito. Narito ang katunayan:
“Nakikita
mo na ang pananampalataya ay gumagawang kalakip ng kaniyang mga gawa, at sa pamamagitan ng mga gawa ay naging sakdal ang pananampalataya;”
Kaya kung
sasabihin nila na hindi na kailangan ang gawa, aba eh paano magiging sakdal ang
pananampalataya kung walang gawa?
Ano pa ang
kailangan ng taong sumasampalataya? Tatanggapin mo lang ba si Cristo sa iyong
puso gaya ng sinasabi nila?
Ganito naman ang
nakasulat sa Filipos
1:29
“Sapagka't sa inyo'y ipinagkaloob alang-alang kay Cristo, hindi lamang
upang manampalataya sa kaniya, kundi upang magtiis din
naman alangalang sa kaniya:”
Bukod sa susunod sa aral ang mga tunay na mga alagad ni Cristo ay
kinakailangan din naman silang magtiis. Hindi kasi pwedeng pananampalataya lang
ang taglay ng tao dahil wala na siyang pinagkaiba kay satanas kung
pananampalataya lang ang nasa kaniya. Ano ang katunayan?
Sa Santiago 2:19 ay ganito ang mababasa:
“Sumasampalataya ka sa iisang Dios, hindi ba? Mabuti iyan! Ang mga
demonyo man ay sumasampalataya rin – at nangangatal pa.”(MB)
Kung pananampalataya lang pala ang basehan sa kaligtasan, aba eh mas may
karapatan pa pala sa kaligtasan ang mga demonyo kesa sa mga nagtuturo na hindi
na kailangan ang gawa dahil mas matindi pa ang pananampalataya ng mga demonyo
kesa sa kanila. Pero alam nating hindi maliligtas ang mga demonyo dahil hindi
naman nila ginagawa ang aral ni Cristo kaya ang mga nagsasabing hindi na
kailangan ng gawa ay wala din pinagkaiba sa pananampalataya ng mga demonyo. Kaya
napaka maling sabihin na wala ng gagawin ang tao para maligtas.
Ano ang tawag ni Apostol Santiago sa mga taong nagsasabing sumampalataya
lang at wala ng gagawin? Basahin
natin sa Santiago
2:20
“Datapuwa’t
ibig mo bagang maalaman, Oh taong walang kabuluhan, na ang pananampalataya
na walang mga gawa ay baog?
Masakit man
ito pero biblia mismo ang may sabi na ang tawag ni Apostol Santiago sa mga
nagsasabi na hindi kailangan ang gawa ay taong walang kabuluhan. Sa ibang salin
pa nga ng biblia ay HANGAL ang banggit.
Ano ba ang
ibig sabihin ng taong walang kabuluhan sa biblia?
Sa Kawikaan
6:12 ay ganito ang mababasa:
“Taong
walang kabuluhan, taong masama, ay siya na lumalakad na may
masamang bibig.”
Samakatuwid ay may masamang bibig pala ang sinumang nagtuturo na hindi na
kailangan ang gawa para maligtas.
Kaya nga may sumbat si Cristo sa mga taong tumatawag sa kaniya ng
Panginoon pero hindi naman ginagawa ang sinasabi niya. Mababasa natin iyan sa Lukas
6:46
“Tinatawag
ninyo akong ‘Panginoon, Panginoon,’ ngunit hindi naman ninyo ginagawa ang
sinasabi ko.” (MB)
Ibig
sabihin, napaka importante ng pagsunod sa turo ni Cristo, kailangang ginagawa
ito dahil ito ang magpapatunay na sila ang mga tunay na alagad Niya.
Hindi kasi maliligtas ang mga taong hindi gaganap sa turo niyang galing
sa Dios. Ang
katunayan nito ay ang nakasulat sa Mateo 7:21
“Hindi
lahat ng tumatawag sa akin, ‘Panginoon, Panginoon,’ ay papasok sa kaharian ng
langit, kundi yaon lamang sumusunod sa kalooban ng aking Amang nasa
langit.”
Ang mga
taong maliligtas na makakapasok sa kaharian ng langit ay yaon “lamang” mga
taong gumaganap ng kalooban ng Amang nasa langit. Sila ang mga tunay na
sumasampalataya at mga tunay na mga alagad ni Cristo. Sila din ang mga
itinuturing na mga anak ng Diyos. Narito ang katunayan
I Juan 3:10
“Dito
nahahayag ang mga anak ng Dios, at ang mga anak ng diablo: ang
sinomang hindi gumagawa ng katuwiran ay
hindi sa Dios, ni ang hindi umiibig sa kaniyang kapatid.”
Mga anak ng
Dios ang gumagawa ng katuwiran o salita ng Dios kaya kapag ang tinuturo ay
hindi na kailangan ang gawa, alam niyo na kung kaninong anak sila ayon sa
biblia.
Ano ba ang
kapalaran ng mga gumagawa ng kalooban ng Dios?
Kapag
binasa natin ang Apocalipsis 14:13 ay ganito ang mababasa:
“…Mapapalad
ang mga patay na nangamatay sa Panginoon mula ngayon: oo, sinasabi ng Espiritu,
upang sila’y mangagpahinga sa kanilang mga gawa; sapagka’t ang kanilang mga gawa
ay sumusunod sa kanila.”
Kaya huwag
na tayong magbaka sakali sa maling aral na hindi na kailangan ng gawa. Tiniyak
ng biblia na ang mga gumagawa ng aral ni Cristo at ng Ama ang makakapasok sa
langit. Ang mga kumikilala sa Dios ay hindi dapat nagbabakasakali lalo na at
kaluluwa niya ang nakasalalay. Dapat niyang masiguro ang kanyang kaligtasan gaya ng sinasabi ni
Apostol Pablo sa I Corinto 9:26
“Kaya ako’y
tumatakbo tungo sa isang tiyak na hangganan; hindi ako sumusuntok sa
hangin.”
Kaya ang aral na “sumampalataya
lamang” ay ligtas na ay aral na suntok sa hangin. Ibig sabihin hindi
ikapagtatamo ng kaligtasan dahil napatunayan nating labag ito sa itinuturo ng
biblia.
Napatunayan natin na nagkamali ng
pakahulugan ang mga gumagamit ng John 3:16 sa kanilang pagtuturo.
Pero imbes na ipagdamdam ninyo ang
aming paglalahad na ito ay inyong ituring na isang pagmamalasakit sa inyo. Kami
po ay nagsasabi ng katotohanang ito batay sa mga salita na nakasulat sa Biblia
na sana po’y
siyang ating tanggapin, paniwalaan, at higit po sa lahat ay ating sundin.
Sa susunod ay tatalakayin natin kung
tama ba ang kanilang pagkaunawa sa Galacia 2:16, Efeso 2:9 at Tito 3:5
Hanggang sa susunod…
Walang komento:
Mag-post ng isang Komento